政情：何喜華爆政府有錢唔扶貧
政府擬推百億元關愛基金扶貧，不過，計劃公布以來就畀人鬧個不停，社區組織協會主任何喜華尋日喺一個電台節目中撰文，又係批評政府扶貧講多過做，仲指出港府扶貧失敗並非因為冇錢，而係用不得其所，甚至嘥料。
幫窮人三十年嘅何喜華對治窮好有心得，佢話，政府過往都設立咗唔少基金，但因為行政因循、善款用得又慢又少，好似兒童發展基金咁，立法會財務委員會○八年明明批出三億元撥款，至今足足兩年都只係用咗二千萬唔夠，認真嘥料。用六合彩款項成立嘅獎券基金更加累積到有八十億元，足見當局唔係冇錢扶貧，而係唔知點解啲錢擺喺度唔用，搞到市民又繼續捱窮。
講起呢個關愛基金，先後畀人圍插，依家又輪到何喜華「籠裏雞作反」，似乎政府將異見人士收入建制嘅效果好麻麻喎。