政情：渡海泳一哥落水救申亞

二○一一年將至，政府喺新一年嘅頭炮就係民政事務局硬闖立法會就申亞攞撥款，所以一月十四日前都係政府嘅申亞衝刺期。為免廣州亞運刺激嘅民間熱情迅速冷化，政府新聞處好花心思，尋日就喺新聞網裏播出六、七十年代嘅三屆渡海泳冠軍兼香港業餘游泳總會義務秘書王敏超做專訪，佢大講自己由運動員到體育界人士嘅經歷，儼然係申亞大使咁款，差在未打出「有申亞 冇病夫」嘅口號啫。

政府新聞網呢個王敏超嘅專訪擺明幫政府出拳，事關王敏超專訪嘅重點全部圍繞運動員需要大賽經驗；香港游泳設施不足；香港體育太落後等，好似只要申亞，上述問題就可以全部解決咁。佢喺訪問中回顧咗參賽嘅難忘事外，然後重點炮轟本港泳隊冇足夠場地和泳線練習，依家急切需要做規劃同建設體育設施，王敏超不無遺憾咁話：「香港作為國際化城市，很多方面均於亞洲區名列前茅，唯獨係體育好落後，我好希望香港能走快些。」

政府新聞網聖誕出招

佢仲透露，協會正向政府申請復辦早喺一九七九年停辦嘅維港渡海泳，希望香港有番一個矚目嘅賽事，對於申亞工作甚至體育運動是否涉政治化一事，王敏超話：「體育就係體育，我好同意黃金寶喺立法會上講嘅，（港人）應該要放遠目光，以宏觀嘅角度去考慮。」

政府為咗催谷申亞，依家連三十年前嘅體壇老將都喺聖誕檔期出擊，宣傳不遺餘力，似乎佢哋真以為申亞成功，香港就可以做到亞洲乃至國際強者噃！