一團一導遊 反對冇理由

有朋自遠方來，不亦樂乎。聖誕同新年旅遊旺季又到嘞，港人外出旅遊，外人來港旅遊，各適其適，出入兩旺，皆大歡喜。正如蘇東坡話齋，「一年好景君須記，正是橙黃橘綠時」，對於旅遊業從業員嚟講，依家正係一年最好景嘅時候喇。不過咁，有人歡喜有人嬲，導遊總工會居然威脅喺聖誕及新年期間罷工喎，真係令人莫名其妙。

點解咁掃興？件事係咁嘅，近年本港旅遊業是非多多，周不時爆出強迫購物、黑店劏客等醜聞，尤其係較早前發生嘅惡導遊阿珍事件，令香港臭名遠揚，形象蕩然無存。旅遊業議會為咗亡羊補牢，早排推出加強規管旅行社及導遊嘅所謂十招，包括一團一導遊、導遊記分制等。

本來呢，遲到好過冇到，有招好過冇招，業界採取措施自我規管，點都好過乜都唔做。問題係，導遊總工會聲稱，導遊收入欠保障，唔少導遊仍被旅行社剋扣小費，要靠「跳團」及「劏客」維生，假如實行一團一導遊制度，將會嚴重影響佢哋嘅生計。所以咯喎，該會醞釀趁聖誕及新年旺季罷工，預計將有六百名帶內地團嘅導遊參加咁話。

正所謂公說公有理，婆說婆有理，究竟誰是誰非，真係審死官。但無論點都好，香港旅遊業之所以七國咁亂，皆因長期無王管，依家難得旅遊業議會肯正視現實，推出補鑊措施，點都值得支持嘅。事實上，推行一團一導遊嘅目的就係打擊「跳團」及「劏客」等不良手法，將旅遊業拉回正軌，所以獲得大部分業界人士支持，導遊總工會以影響生計為理由而提出反對，實在欠缺說服力。再講喇，就算佢哋有唔同意見，都可以坐低慢慢傾嘅啫，點解一定要揀呢個時候罷工呢？

計太一叮話齋，導遊爭取自己權益無可厚非，但唔好唔記得，無論爭取乜嘢權益，採取乜嘢行動，都有一個大前提，就係唔可以損害香港整體利益。其實，加強規管旅行社及導遊係天經地義，如果連咁都唔肯接受，香港旅遊業又點可能撥亂反正，重回正軌呀。

不過，話又講番轉頭，旅遊業議會推出嘅所謂十招，雖然獲得普遍支持，但究竟止唔止到咳，可唔可以杜絕劏客歪風，仲係未知之數。話晒旅遊業議會只係一個業界自律組織，自己人監管自己人，效果大極有限。講到尾，解鈴還須繫鈴人，監管旅遊業，始終係港府嘅責任，如果當局繼續闊佬懶理，翹埋雙手乜都唔做，莫講話旅議會推出十招，就算推出一百招都係嘥氣。叮！