政情：汪阿姐為城大度橋
仲記得年前八和會館申請改建北九龍裁判法院做粵劇文化中心失敗，搞到主席汪明荃忍唔住鬧爆政府對粵劇界支持唔夠，但近來汪阿姐同政府嘅關係修補咗好多，政府尋日就刊憲，公布委任汪阿姐為香港城市大學顧問委員會成員，明年一月一號生效，任期三年。
原來汪阿姐同城大好有淵源，城大喺○七年頒授咗個榮譽文學博士學位畀佢，表揚佢喺演藝文化界嘅成就同貢獻，今次做埋大學顧問委員會成員，汪阿姐就可以幫城大出謀獻策，推動未來發展，話唔定仲可以喺城大搞番個藝術課程，教吓班學生唱大戲添！
城大顧問委員會嘅成員除咗大學人士，仲有唔少商界翹楚、社會賢達同城大好友，除咗汪阿姐之外，獲委任嘅成員仲有立法會議員何鍾泰等，不過憲報又出錯，誤將何鍾泰嘅「鍾」字寫成「鐘」字，變相幫佢改名，認真失禮！
汪明荃