政情：搞搞政：局長排隊放假好帶挈

每年聖誕節，班司局長都爭崩頭放假，今年亦唔例外。過去兩年長期處於半退休狀態嘅煲呔曾率先帶頭請假偷閒，政府新聞處尋日出稿，話佢將由後日起休假，下禮拜五先返工，期間其職務由政務司司長唐唐署理。

其他局長都唔執輸，嚟緊有五個局長放假。政府憲報顯示，人稱「每周一鑊」嘅食物及衞生局局長周一嶽由聽日起攤抖四日，後日輪到政制及內地事務局局長「林公公」林瑞麟接力，政改本地立法暗湧四起，但佢似乎冇放喺眼中，休假到二十九號返工，之後一月五號又請假，到十號為止。

商務及經濟發展局局長劉吳惠蘭、教育局局長孫明揚同環境局局長邱騰華，全部由二十八日起休假，劉吳惠蘭三十號返工，孫公同邱騰華就明年一月一號先至復工，五個局長齊齊趁聖誕新年起錨放假攤抖。

局長喺聖誕新年期間休假，掉低晒啲嘢畀佢哋五位副局跟，全部要留守政府做署理局長，包括食衞局副局梁卓偉、政制及內地事務局副局黃靜文、商務及經濟發展局副局蘇錦樑、教育局副局陳維安同環境局副局潘潔，佢哋冇假放，真係多得佢哋幾位「識歎」嘅上司帶挈囉！