政情：IT豪踩入禁毒委員會
近年嚟，青少年吸毒嘅情況愈嚟愈嚴重，政府不斷諗橋去遏止情況惡化落去，早前就推出校園驗毒試驗計劃，雖然政府話有成效，但外界批評呢種係治標唔治本嘅做法。咁點先得呢？當然係要針對青少年嘅需要同諗法。
政府尋日刊登憲報，公布禁毒常務委員會嘅委任名單，主席同十個舊成員獲再度委任，再委任多六個新人，當中包括立法會資訊科技界議員「IT豪」譚偉豪。禁毒專員黃碧兒話，希望嚟自唔同範疇嘅六名新委員可以為委員會帶嚟新意念同新動力喎！
老實講，依家青少年多用互聯網嚟溝通，包括IT豪在內嘅專業人士都批評過政府諮詢方式落後，內部IT差勁，根本追唔上社會步伐，當然好難同青少年溝通到。
依家禁毒工作好着重青少年問題，咁就要考吓曾經鬧過政府IT落後嘅IT豪，睇佢有乜板斧幫到手嘞！
IT豪曾批評政府諮詢方式落後，內部IT差勁。 （資料圖片）