政情：擠入監警會 白鴿黨分粒糖

政府當正自己係聖誕老人咁，喺尋日平安夜大派聖誕禮物，一時間公布咗好多個法定機構同諮詢委員會嘅委任名單，當中唔少係新人，而眾多諮詢委員中，其中一個值得注意。

獨立監察警方處理投訴委員會最新委任名單尋日刊憲，有十個新面孔，最令人眼前一亮嘅，係啱啱做咗白鴿黨中委嘅普選聯副召集人黃碧雲。政改通過，政府論功行賞，普選聯有份撐政改，惟黃碧雲喺今年七一授勳名單上冇份，依家多咗個公職銜頭，算係攞番個安慰獎。

黃碧雲話月前收到保安局電話，問佢有冇興趣加入監警會幫手，雖然佢一直唔係呢方面嘅專家，但對人權、女權一直都相當關注，加上佢好多民間團體朋友都好關心警權過大嘅問題，所以一收到電話就義不容辭，一口應承，但佢相信今次委任同佢喺普選聯嘅身份無關。

九西揼石仔鋪路參選

本身係理大通識教育中心講師嘅黃碧雲，自今年初加入普選聯後，成功推動政制向前行一步後人氣急升，成為白鴿黨力捧嘅新星之一。上禮拜白鴿黨改選，又畀佢成功爭取加入中委，雖然冇再進一步躋身中常委，但佢已經開始喺九西揼石仔，傳聞嚟緊區議會同立法會選舉都會積極考慮參加。依家佢獲委入監警會，又多一個發聲平台，多啲曝光點都對選舉有利，就算只係有粒糖仔都應該開心啦！

其實，喺舊年六月起升格為法定機構嘅監警會，早前被本報揭露委員出席率奇差，好似身兼立法會議員嘅副主席林大輝同「大舊石」石禮謙，喺過去一年半時間缺席咗一半會議。不過，政府又再度委任大輝同大舊石喎，希望佢哋以後監察警方之餘，亦好好睇緊啲自己嘅出席率。

至於同被指出席率差嘅教聯會會長楊耀忠等人，則喺新名單中消失，取而代之嘅新面孔，包括青聯常務副主席葉振都等。