衛生署兒戲執法 問題藥通街照賣

規管中成藥嘅新例月初已經生效,中成藥無王管嘅日子終於結束喇!法例規定,任何人銷售、進口或者管有未經註冊中成藥即屬違法,最高罰款十萬元及監禁兩年,都咪話唔嚴,奸商一定嚇到鼻哥窿冇肉啦,睇吓邊個夠膽以身試法!

問題係,港府不嬲有法不依,執法不嚴,如果今次舊病復發,法例再嚴都係嘥氣嘅啫。咦,食衞局局長周一嶽好似轉咗性噃,轄下衞生署成立咗一支三十人嘅大隊,係威係勢咁巡查中成藥零售商同批發商。

可惜有姿勢冇實際,法例實施兩星期以來,先至巡咗八十幾間店舖,即係每人每月平均巡查四點四間店舖咁大把。衞生署話,未發現任何違規行為喎。

之不過,本報記者好快就踢爆天下太平嘅謊言。記者扮顧客巡查咗屋邨商場嘅臨時攤檔、藥房同埋泰國及印尼雜貨店,發現二十幾種未經註冊嘅中成藥,其中弄虛作假嘅問題,令人觸目驚心。

嗱,某藥房有隻冇註冊嘅皮膚膏,包裝上面居然寫住「香港政府註冊」,擺明係呃神騙鬼啦,但係仍可以大模廝樣擺賣。部分泰國或者印尼雜貨店出售嘅中成藥,包裝上連中文字都唔多個,更冇註冊編號同香港代理商資料,一睇就知道係未經註冊嘅啦。

講到網站更得人驚,新例生效後,有賣家仲喺網站出售有中藥成分嘅減肥藥,仲吹水話藥到病除,講到天上有地下無,但查實又係未經註冊嘅。

因乜事會漏洞多多呢?無他嘅,事關衞生署官員懶到出汁,打個比方,佢哋巡店舖,就好似康文署樹隊巡樹咁求其。

呢幾年周不時會發生冧樹砸死人事件,出事前樹隊都檢查過,話棵樹唔會有事,點知話口未完就樹倒人亡。原來佢哋用嘅係「目測法」,即係求其睇一眼就話冇問題,咁兒戲,唔出事至奇。

家陣衞生署巡查大員用嘅同樣係目測法,佢哋入舖頭兜一圈,掃一眼藥架,連邊啲藥有註冊、邊啲冇註冊都未搞清楚,就實牙實齒話冇違規行為,直情兒戲到唔使恨。仲有,佢哋淨係巡查中藥店,冇去臨時攤檔、泰國同印尼雜貨店,而呢啲都係問題中成藥最集中嘅地方,有乜法子唔放生奸商呀?

大佬呀,未經註冊嘅中成藥,分分鐘會食死人㗎。衞生署視而不見,同康文署樹隊靠害途人有乜分別呀?叮!

所以,計太一叮話齋,新例生效唔等於萬事大吉,中成藥註冊形同虛設、問題多籮籮,大家如果唔想撞板,就要帶眼識藥,自己執生,千祈唔好信周一嶽等人嘅鬼話。叮!