政情：搞搞政：麥瑞琼入紀常會夠硬淨
本港首個最低工資二十八蚊出台後，由商界同勞工界組成嘅臨時最低工資委員會功成身退，其中大家樂集團主席陳裕光早前因爆出「扣飯鐘錢」風波，自言政治智慧不足，以後唔再出任公職，但另一商界代表、香港零售管理協會主席麥瑞琼似乎就冇有怕喎！
曾同勞工界撐到行
政府尋日公布紀律人員薪俸及服務條件常務委員會嘅委任名單，再度委任張震遠做主席，新委員有港交所上市委員會主席高育賢、畢馬威合夥人吳麗莎同麥瑞琼，任期兩年，由明年一月初至一二年十二月底。三名新人中，以麥瑞琼最惹火，據聞喺臨資會內同陳裕光企喺同一陣線，同班勞工界代表撐到行嘅就係佢嘞。
唔知政府係咪睇中佢喺臨資會嘅表現，所以委任佢入紀常會，日後遇到薪津問題拗數時，以佢嘅強硬態度壓住班紀律部隊工會呢？
