政情：梁美芬組黨食檸檬

繼匯賢智庫葉劉淑儀牽頭組成新民黨之後，建制派另一名女將、身兼西九動力主席嘅專業會議立法會九龍西議員梁美芬，尋日亦透口風，話西九新動力內部曾經討論，係咪應該同專業會議組黨，將兩股力量集結為一。嘩！若果成真，就會瞬間變成一個擁有四名立法會議員同三十幾名區議員嘅中型政黨，而專業會議變政黨，四名議員投票一致，以後同政府就某啲政策討價還價都有力啲，直選方面又可起協同效應，實力不容小覷喎！

神女有心，襄王又點睇呢？盟友兼工程界議員何鍾泰話西九新動力、專業會議同佢旗下嘅工程界社促會，三個單位未來會有好多合作空間，好似早前就聯手發起關注油麻地避風塘水質問題運動，但講到組黨，佢話：「我哋冇傾過，亦冇諗過！」又指組黨非簡單之事，記者突然要佢表態，「生勾勾，唔知點答」。其實，佢嘅答案已經呼之欲出啦！

據悉，葉劉籌組新民黨時，亦曾敲過專業會議嘅門，四人全部耍手擰頭，其中一個原因就係有人唔鍾意組黨，既然對葉劉嘅招手無動於衷，咁又點會畀梁美芬忽然感動呢？