政情：蘇錦樑亂抄嘢被轟

多次喺立法會審議競爭法嘅草案委員會上慘成箭靶嘅商務及經濟發展局副局長蘇錦樑，尋日喺委員會上再被萬箭穿心，罪名係亂抄嘢。

蘇錦樑再為競爭法護航，指條文已參考咗國際最佳做法，叫議員可以參考外國案例。此話一出，引發反對立法嘅議員群起圍攻。新民黨主席葉劉淑儀批評政府真係好不智，歐盟將競爭法當貿易武器，攞嚟同美國大企業鬥法，政府瞇埋眼亂咁抄，真係唔知「英文退化定大腦退化」。

「立法太急好易出事」

喺加拿大讀法律嘅蘇錦樑，英文應該冇咁易退化，但唔代表抄襲外國一套就一定識揀好嘢嚟抄。保險界陳健波亦認同葉劉嘅觀點，指特區政府為競爭法立法，只係識左抄抄、右抄抄，全世界最辣嘅抄晒出嚟，炒埋一碟，食死香港人，拜託政府唔好再亂抄一通。一向講嘢啜核嘅旅遊界謝偉俊亦贈興話，立法太急，好易出事，問蘇錦樑有冇開始聞到燶味？其實蘇錦樑早就畀炮火燒燶咗啦！