政情：《起錨歌》極速變爛片

特首辦懶新潮咁學人請Rap歌歌手歐陽靖（MC Jin）拍短片同市民慶聖誕，聖誕歌變《起錨歌》，條片發布咗短短一日，除咗惹嚟網民大肆惡搞，仲有近五千人喺YouTube「dislike」，即係表示厭惡！尋日CNN旗下嘅CNN go發表「最令人眼冤嘅香港政府宣傳片」，《起錨歌》追過其他爛片，極速上榜，CNN仲狂轟《起錨歌》係「披着羊皮的狼」，極具政治意味。

就算係義務相助嘅MC Jin亦難逃被批命運，CNN話佢不斷令市民回憶起五月嘅「起錨騷」，令成條片變成一張極具政治意識嘅聖誕卡，完全違背恭祝聖誕嘅原意，而MC Jin嘅表現更加同佢過往嘅表現大相逕庭，一啲都唔似Rap，好似唱兒歌咁！

除咗《起錨歌》之外，上榜嘅仲包括財爺鬍鬚曾上年財政預算案嘅宣傳片，以及食物安全標籤宣傳片等，全部都被評為睇完即眼冤！