政情：刻薄中介僱員D姐好縮骨

喺梁展文事件中備受批評嘅公務員事務局局長「D姐」俞宗怡，呢排都算當黑喇！上禮拜三佢先喺立法會辯論梁展文報告時，畀議員輪流圍攻，尋日上立法會公務員及資助機構員工事務委員會開會，一樣畀議員不停質問，尤其擔任梁展文專責委員會主席嘅勞聯立法會議員李鳳英，好似對D姐特別感「興趣」。

事務委員會開會第一樣傾嘅，好多時都係下次會議嘅討論事項，呢個時候仲喺等候室嘅D姐仲未埋位，身在會議室嘅英姐已經率先出招，要求傾吓專責委員會同埋政府嘅首長級公務員離職就業檢討委員會份報告，先攞一分。

英姐篤住文件壓軸發炮

之後到咗傾中介公司問題時，英姐未有立即發炮，反而先畀機會其他議員提問，自己做壓軸嗰個。輪到佢時，第一句就話對政府失望，事關大家一直金睛火眼實非公務員合約工嘅問題，卒之依家睇得緊咗，政府就用中介公司搵人，最弊係呢類中介公司僱員嘅薪酬比合約工差一大截，潛台詞即係暗批D姐縮骨！

意猶未盡嘅英姐仲篤住份文件話，家陣有千六個中介公司僱員嘅合約，長達十幾二十個月，同政府聲稱唔長過九個月有矛盾，個個部門都係咁，唔使請公務員啦！

相比喺梁展文事件中，呢次D姐有更大還擊空間，佢除咗多謝英姐意見外，一嚟就話唔同意英姐觀點，接住指正英姐話嗰千六人喺政府出指引，列明中介公司僱員嘅合約最長九個月之前請嘅，變相話英姐鬧錯嘢；最後仲話今年四月出指引後已經嚴厲執行，為自己攞番個尾彩。

雖然其他議員都有跟進中介公司僱員問題，而佢哋嘅言辭亦唔多好聽，不過都係英姐同D姐之間嘅互動有睇頭。梁展文件事餘波未了，相信佢哋兩個仲有大把機會再擦出火花。