政情：特首辦搵MC Jin起錨超錯

以「上亞厘畢道」做網名嘅特首辦facebook尋日又有新搞作，拍咗條短片同市民講聖誕快樂，仲請咗著名rap歌手歐陽靖（MC Jin）大唱「起錨歌」。條片得短短兩分四十秒，但「香港所有市民，起錨！聖誕節又嚟臨，起錨！」就足足叫咗十六次，相信會勾起唔少之前起錨騷嘅回憶。

雖然首歌嘅旋律同歌詞主要都係MC Jin創作，但特首辦事前指「起錨」、「三三四」、「facebook」等都係過去一年香港政府最熱門、最得人心嘅議題，所以首歌一定要有呢幾個元素。其實喺facebook開戶口算唔上喺乜嘢德政，三三四係噩夢，畀人鬧爆嘅嘢竟然當政績攞嚟唱。

特首辦發言人話係想搵個特別啲、輕鬆嘅方法同市民慶祝聖誕，條片仲喺政府內部被譽為年度佳作添！發言人仲話年輕人一定喜歡MC Jin。

特首辦自我感覺良好，但實情係條片post咗幾個鐘已經劣評如潮，畀網民喪插無聊、肉麻當有趣、官員瞓身做小丑等。嗱！因住愈唱愈衰呀！