醉駕罪無可恕 切勿以酒試法

眨吓眼，普天同慶、舉世同歡嘅聖誕節又快到嘞。太一叮想提醒大家，狂歡即管狂歡，但千祈要記住，揸車莫飲酒，飲酒莫揸車，事關交通新例尋日已經生效，醉駕隨時被重罰，慎防樂極生悲呀。

講起交通新例，都咪話唔重手。新例引入三級遞進刑罰，司機體內酒精比例愈大，罰得愈重，停牌期愈長。除咗危險駕駛引致他人死亡必受重罰之外，新例仲增加危險駕駛引致他人身體受嚴重傷害嘅罪行，一經定罪隨時罰款五萬，監禁七年，問你怕未。

話時話，喺聖誕節前推出新例都幾及時嘅。舊年平安夜，有位中學老師喺返學校途中畀一個醉駕司機撞死，狂歡之夜變奪命之夜，醉駕害己害人，簡直罪無可恕。依家推出新例，加重刑罰，希望可以收到阻嚇作用。

其實，近年醉駕事故屢禁不絕，唔少人枉死輪下，講到底都係因為之前刑罰太輕。好似舊年年初落馬洲嗰單貨車壓扁的士事件，貨車司機酒後駕駛撞死六個人，先至判監六年咁大把，平均一條人命監禁一年，引起全城嘩然。輿論紛紛要求修例加重醉駕罰則，千呼萬喚之下，當局終於推出新例，遲係遲咗啲，但遲到總好過冇到，最怕嘅係，當局有法不依，執法不嚴，對危駕人士高高舉起，輕輕放低，令新例形同虛設，咁就枉費心機囉。

計太一叮話齋，除咗醉駕害己害人，司機嘅駕駛態度亦好緊要，事關好多交通事故都係因為司機駕駛態度惡劣所造成。呢，法院尋日審訊一單奪命交通意外，法官直斥肇事貨車司機一直忽視煞車系統有毛病，駕駛態度好有問題，結果撞倒一對過緊馬路嘅母子，母死子重傷。呢個司機據講有二十年駕駛經驗，居然犯咁低級嘅錯誤，講到底皆因漠視交通安全，視途人生命如草芥，叮！

仲有吖，舊年喺深圳撞死一名嬰兒嘅香港貨車司機，尋日亦因故意殺人罪，被深圳法院判處死刑，緩刑兩年。被告就話暫時執番條命啫，但被佢撞死嘅嬰兒已經冇可能翻生，你話幾無辜吖，唔怪得死者家人指判刑太輕喇。老實講，危險駕駛同謀殺根本冇乜分別，對嗰啲駕駛態度特別惡劣嘅司機實行嚴刑峻法，好多人舉腳贊成。

開講有話，馬路如虎口，香港馬路交通黑點多不特止，仲有咁多醉駕、藥駕、危駕，直情係陷阱處處，危機四伏。所以，太一叮喺度不厭其煩再次提醒各位駕駛人士，為人為己，揸車莫飲酒，飲酒莫揸車。當然，其他道路使用者更加要自求多福，眼觀四面，耳聽八方，切記，切記！