政情：搞搞政：周融戴健文爭台長又陪跑
港台一哥因為黃華麒唔續約再現空缺，港府尋日又登報招聘廣播處長，搵人喺明年二月後接手。不過，有咗上次請人唔使大學學歷嘅教訓，政府都冇學乖，繼續訂下有十五年傳媒經驗、冇大學學位嘅人都可應徵嘅條件。早前助理廣播處長戴健文已透露有意申請，尋日又輪到另一個兩年前搞出連串風波嘅周融話考慮再玩過，今次招聘點睇都好似兩年前嘅翻版咁，只係唔知佢哋最終係咪又陪跑一場？
政府份新廣播處長招聘廣告，同兩年前嗰份差唔多一式一樣，入職條件都係需要最少十五年擔任高層職位經驗，持有本港大學學位或同等學歷，如果冇都得，有十五年傳媒經驗即可；合約期三年，月薪十六萬元，條件咁優厚，勇夫當然都唔少。早前戴健文表咗態，尋日周融又話會考慮吓捲土重來應聘。
被問到今次請人係咪又度身訂造？商務及經濟發展局局長劉吳惠蘭話，新廣播處長嘅招聘條件同上次一樣，對問題不置可否，更加懶理港台員工質疑政府嘅公開招聘。不過，兩年前嘅戲又做一次，觀眾會唔會悶㗎？