政情：棠哥頸椎移位激瘦廿磅
健康係政圈人士一個大資本，工聯會會長、行政會議成員鄭耀棠最近忽然消瘦，唔止小肚腩消失，臉、頸、膊頭都縮咗水，效果仲明顯過畀錢參加瘦身工程，政圈梗係吱吱噚啦，工聯會總舵主唔知係咪見勢色唔對，尋日主動解謎，話佢患上頸椎移位，加上減少外出應酬食好嘢，體重先急跌近廿磅啫。
棠哥話，佢十月初去內地武當山旅行，落山時發覺唔妥，手腳麻痹，經醫生一查，先知平時太少運動，致令頸椎移位，依家定期返廣州做推拿同氣功治療；雖然手有時會痹，但已經好咗好多。
外界最關心嘅係佢仲會唔會出戰超級區議會，事關佢月前透露唔排除披甲上陣，棠哥就話：「依家全港都有我嘅街板吖！」不過，知情人士認為一向閒雲野鶴嘅棠哥未必會玩直選，不過會方嘅部署就要令對手猜唔透。講完自己後，棠哥仲話，工聯會將重點栽培八名第二梯隊，作為選拔出戰一二年直選嘅種子，睇嚟佢滿腹大計，真係唔得閒病噃。
棠哥依家定期返廣州做推拿同氣功治療，已經好咗好多。