政情：張建東改搭巴士撐減碳
城中潮講低碳生活，機場管理局主席張建東（Marvin）透露，佢都有響應減碳，每逢去中環處理公私務，都會放棄豪華座駕改搭巴士。佢仲驚人唔信，講明選搭嘅路線係新巴3B、12或12A，仲自爆攞咗長者卡，享有長者半價優惠，每程只需兩蚊多啲。
機場管理局尋日介紹機場減碳排放工作，Marvin就話，自從幾年前患病痊愈後，每日勤做運動，行路都多咗。佢係行會成員，每逢周二都要去中環政府總部開行會或者返辦公室，多數搭巴士代步。記得Marvin兩年前由薄扶林富林苑搬到中區堅尼地道堅麗閣，上述三條巴士線喺堅麗閣門口都有站，證明Marvin搭巴士真係無花無假。