政情：高達窒霍家似北韓
政府決定硬闖立法會要求申亞，尋日立法會民政事務委員會舉行特別會議討論申亞事宜，議員質疑政府堅持申辦嘅意圖，仲燒埋身兼港協暨奧委會會長嘅立法會體育界代表霍震霆，搞到全個會議都冇開腔嘅霍公子忍唔住反擊。
白鴿黨嘅高達李永達喺會上大數政府，仲話由霍公子做會長嘅港協暨奧委會欠缺透明度，佢聽聞霍公子嘅囝囝霍啟剛會接任做會長，直言呢個傳聞令人好難接受，冇理由香港嘅體育組織好似變成北韓咁，採用世襲制度咁封建，高達仲話，冇可能呢個組織由霍家壟斷啫？
霍公子坐足全程都冇發言，聽到呢句批評後就再都忍唔住，話大家都有家人，都希望年輕人參與多啲社會活動，聽到高達對佢哋嘅標籤，覺得好過分喎！