政情：謝卓飛思鄉返英過聖誕
聖誕將至，由英國來港出任西九文化區管理局行政總裁嘅謝卓飛都思鄉情切，決定返倫敦過節，臨上飛機前，佢尋日都帶埋三位西九管理局行政總監同傳媒聚吓。
謝卓飛係兩子之父，今年八月隻身飛嚟香港做西九開荒牛，已經返咗四個月工，所以打算趁聖誕新年長假期返倫敦見屋企人。問佢有冇打算喺香港買定禮物畀兩個囝囝？佢就話兩個囝囝已長大，唔使佢買禮物，做爸爸嘅都係折現算數。其實一家人共敍天倫，有冇禮物都唔重要啦！
謝卓飛（右二）尋日同西九項目推展行政總監陳文偉（左一）、表演藝術行政總監茹國烈（左二）同傳訊及推廣行政總監陳家耀（右一），同傳媒茶敍提早賀聖誕。