政情：葉劉立會炒4車「賀」創黨

新民黨主席葉劉淑儀日前啱啱創黨，點知開心得兩日，尋日已經畀單「不可能的車禍」搞到黑口黑面。事緣葉劉嘅七人座駕尋日喺立法會停車場「S」形飄移，先後撞到四架車，搞到三個議員同事及立法會秘書處一個高層嘅車都好傷吓，受傷車輛中有保時捷，又有新簇簇嘅平治，睇怕車禍嘅維修費好昂貴。

意外喺尋日下晝三點幾發生，葉劉乘座駕抵達立法會後，佢嘅司機隨即開車駛離，點知架車忽然呈「S」形行駛，懷疑有人不小心將腳部攝喺油門與腳掣之間，搞到無法控制座駕，結果架車突然加速衝前三十米，先撞向停泊喺對面嘅平治房車右邊車尾，繼而失控撞向停泊喺右邊嘅三輛私家車車頭。

報警處理 黑面道歉

「遇害」車輛包括潘佩璆嘅平治房車，跟住係鄉事派張學明嘅七人豪華房車、社民連黃毓民嘅銀色七人車及立法會秘書處一個高層嘅保時捷跑車。現場所見，學明嘅座駕最傷，不但撞凹咗車頭「鬼面罩」，連車牌都撞斷埋，但佢趕時間離開，學明嘅司機最後要借膠紙為車牌做接駁手術，當然都唔得閒同葉劉交涉喇。

潘佩璆見到自己部平治花晒，肉都赤埋，不斷觸摸車身「呵」番，又話要報警。其後葉劉親身到停車場視察幾部車嘅「傷勢」，都係決定報警處理，同時交由保險公司處理賠償維修費事宜，葉劉承諾會向受影響嘅車主逐一道歉，亦願意賠償，不過，睇佢黑口黑面嘅樣，心情都唔慌好。又係嘅，呢頭先啱啱創黨，嗰頭就喺立法會停車場爆單咁杰撻撻嘅車禍，似乎唔多吉利噃！