短打長擊：湯至清則無鼠

寒流襲至，十度以下吃火鍋特別過癮，呢幾日唔一早訂位，肯定要回家食自己。港人愛打邊爐，是以四季都有火鍋店，熱天也開大冷氣，在酒樓食肆打個不亦樂乎。

有些港人喜歡北上吃火鍋，但原來咁樣分分鐘食唔死都嚇瓜！本報「Sun角度」講咗一單內地新聞，有人食食吓火鍋，臨尾才赫然見到一隻老鼠。呢客「老鼠鍋」驚嚇程度十級！若是筆者，肯定黃疸水都嘔出來，三個月吃不下任何東西，終生唔敢再食火鍋。

港人北上消費已成潮流，覓食係其中一環，如果有門路就會食到好嘢，但也很容易吃出禍來。以火鍋為例，傳媒發現，內地八成火鍋是「化學鍋」，以大量化學添加劑或有害物質炮製湯底，多吃無益，更會致癌。吃得如此悲壯，實在太不划算。

火鍋確是一種文化。中國人富想像力，像《清稗類鈔》說：「京師冬日，酒家沽飲，案輒有一小釜，沃湯其中，熾火於下，盤置雞魚羊豕之肉片，俾客自投之，俟熟而食。有雜以菊花瓣者，曰菊花火鍋，宜於小酌。」《奉天通志》記載滿族的冬令傳統筵席「野意火鍋宴」，食材豐富，這火鍋倒蠻適合偷情男女，或富二代與影星私下約會！

火鍋的湯底愈來愈多「花臣」，調味料也一大堆。港人多慌死執輸，胡亂混醬，事實上，傳統的「老七樣」足矣：芝麻醬、腐乳醬、韭菜花醬、辣油、醬油、香蝦油、香菜，太多混醬，吃不出食材的真味。北上吃火鍋，湯底宜清，減少化學風險，少了假味精工業鹽，湯至清則無鼠，吃得安心。