虛有其表拖字訣 規管龕場遙無期

氣溫驟降，孝子賢孫身涼心更涼。港府尋日打孖上，除咗公布首份私營骨灰龕場名單，亦同時交代五個新增龕場嘅選址。問題幾時真正解決？對唔住，答案係：遙遙無期。

當局公布咗八十一間私營骨灰龕場名單，符合地契用途限制及城規要求而被列入「表一」嘅只有二十九間；被列入「表二」，即係唔符合相關要求嘅，多達五十二間。更得人驚嘅係，「表二」名單仲包括多間港人熟悉嘅業內「名牌」，好似粉嶺蓬瀛仙館、大嶼山寶林禪寺、荃灣竹林禪院、屯門青山寺等等。

近三分之二私營龕場唔合格，都咪話唔得人驚。有業內人士警告，呢次可能有超過二十萬先人骨灰「流離失所」。被列入另冊嘅龕場有一半不服「判決」，更有業界組織對政府公布名單反應強烈，話到明會提出司法覆核。

認可骨灰龕場屈指可數，港府居然玩卸膊，唔肯明言「表二」龕場係咪等同違規，仲要消費者自行決定係咪購買有關龕位。有立法會議員直斥當局嘅名單虛有其「表」，欠缺理據解釋點解龕場唔合格。

食物及衞生局局長周一嶽同樣混帳，話會考慮暫時畀市民繼續將骨灰存放喺呢啲龕場，但第日落實規管後一定會執法喎。

叮！港府根本就係玩拖字訣。雖然公布咗名單，但問題點解決一句都冇講，落實規管嘅確切日期都噏唔出。周一嶽講嘅嘢，信佢半成都死。

至於「十八區都有骨灰龕」嘅希望工程，同樣令港人失望。今次公布嘅五個選址位於油尖旺區、深水埗、觀塘、灣仔同中西區，大多數係廟宇或者鄰近現有墳場嘅地點。周一嶽話可提供過萬個骨灰龕位，睇真啲直頭笑爆嘴，其實各選址可提供嘅龕位數字相差甚遠。

好似廟街榕樹頭嘅天后古廟咁，最多只可以提供三百個龕位咁大把，當局好明顯係為咗湊夠數，做到十八區你有我有大家有，但問題係，新選址仲未知居民會唔會接受。退一步講，就算居民接受，可提供嘅龕位相當有限，只係聊勝於無，根本係杯水車薪。

話到尾，骨灰龕位供求失衡，違規經營氾濫成災，始作俑者就係港府。近年當局提供嘅公營骨灰龕位只佔全港火葬宗數一成幾，遠遠滿足唔到需求，市民惟有幫襯私營業者。但當局對業界長期無監無管，搞到私營龕位遍地開花，民居有、農地有、郊野公園有，甚至連佛門清淨地亦淪陷。

叮佢個鎯鎯！生養死葬係政府嘅基本責任，如果當局繼續見步行步，拖延解決問題，耍花招敷衍市民，死者難有其龕，孝子賢孫遲早有一日會抬埋棺材上街。