Sun世代：玩具王子從商唔係講玩

「玩具大王」蔡志明坐擁逾百億元身家，他的「玩具王子」蔡加讚（Karson）幾近要風得風，跑車當玩具。年僅二十四歲，蔡加讚大可當個玩世不恭的二世祖，但「老竇養到我咁大，我一定要返嚟幫手打理生意，減輕佢嘅壓力」。自知肩負重大責任，他大學畢業即學搞商場，再返內地管理玩具廠，朝早巡廠見客，夜晚應酬，落手落腳學做生意，只因「唔想令老竇丟架！」

蔡加讚是旭日國際集團「太子爺」，去年正式獲委任為集團董事，但他待人處事並無「太子爺」的傲氣及架子：「一個口靚仔返去公司，咩都唔識，叫同事點服你？爹哋教我，請教同事一定要謙虛，唔好challenge佢哋、考佢哋，要重視佢哋嘅才能。依家我同同事嘅關係幾好，有時仲一齊食飯。」

「搞唔好就變富士康」

年紀輕輕，蔡加讚時刻西裝骨骨，談吐成熟，若有人覺得他「老竇大把，唔使做」，他亦忍不住略為動氣：「唓，你哋（批評者）識乜啫，初初真係好嬲。有時我未起身，美國客唔會理你瞓緊，就打電話嚟嘈嘈嘈，話隻公仔點改……我做到成隻狗嗰時，邊個知？但慢慢習慣咗，佢哋唔係我，點會明白我嘅位置？我依家返深圳睇廠，有七萬員工跟住我搵食，搞唔好就變富士康。呢啲壓力外人唔會明。」

蔡加讚有個億萬富豪父親，家境富裕，難怪招人眼紅。小時，他家住九肚山，小學及中學均是「喇沙仔」，十六歲更遠赴美國讀書，學費、房租由父母付，零用錢是幾張信用卡，上學代步靠寶馬，放假揸保時捷，大學畢業於南加州大學政治系。○七年他未行畢業禮便回港，到旭日地產部學習，首項任務是將九龍城廣場升格、包裝，父親為獎勵他迅速開展事業，送他夢寐以求的林寶堅尼超級跑車，價值二千萬元。

生於玩具王國，家裏有逾千輛玩具車包圍，長大後名貴跑車亦唾手可得，愛車如命的蔡加讚，連英文名字亦改作Karson（原名Carson，即車神）。

食鮑參翅肚只為應酬

別人注視他的跑車，Karson的目標只想在事業上搏命。他的工作表總排得密麻麻，平日早上未到九點已回到位於上水的辦公室，跟着資深員工學物流管理、人力資源分配，一星期更有兩天返深圳，十一月又把甜品店「甜之迷」轉型做意大利餐廳，忙得不可開交，訪問當日的下午，他也略顯倦意。以為這個有錢仔餐餐鮑參翅肚，他反駁：「我今日都係食咖喱漢堡扒飯。同普通人一樣，我都要食飯、搵錢。鮑魚呢啲只係應酬。」

讀政治出身，他亦愛閱讀報章及留意時事財經：「我哋做出入口生意，人民幣升值同QE2（第二輪量化寬鬆政策）點都有啲影響。」對於社會充斥仇富心理：「呢樣我唔係好方便評論……」他深思一會兒：「我諗以前都有（仇富），依家可能資訊發達咗，大家多咗渠道去發表自己嘅意見，個個都講，先好似好hot（熾熱）。」

為了紓緩工作壓力，周末他喜愛享受獨處的自由自在感覺，除了駕車兜風，亦會游水做運動，幾年前更愛上攝影：「最鍾意影啲平凡嘅嘢，地盤都好多嘢影，例如網、架、竹棚。睇住棟樓一路build up（建立），就好似事業咁慢慢build up。」

蔡加讚小檔案 Karson

年齡：24 婚姻狀況：單身

興趣：跑車、攝影、游泳

學歷：美國南加州大學政治系學士

現職：旭日國際集團執行董事

公職（部分）：深圳政協委員、香港童軍總會新界地域會長、香港專業人士協會青年專業委員會秘書長、沙田社區基金永久董事、沙田少年警訊名譽會長、九龍西潮人聯會副會長