政情：呂志和太太旗袍顯貴氣
嘉華集團前晚喺會展舉辦五十五周年紀念慶祝晚會，集團主席呂志和同太太一早到場，呂太仲滿場飛招呼賓客，佢一襲紫色旗袍大方又貴氣，原來係本港著名中式服裝品牌Blanc de chine（源）嘅出品，而呂太呢套更係老闆楊先生親自為佢挑選。至於新抱，亦穿上「源」嘅黑色旗袍，雖然唔及奶奶搶鏡，但別出心裁嘅不規則剪裁，低調中見一份精緻秀氣。
饒宗頤冒寒撐潮商
入冬以嚟最凍嘅一日，城中名人同潮籍人士卻甘冒氣溫不足九度嘅嚴寒空群出動，為嘅係慶賀香港潮州商會成立九十周年暨第四十七屆會董就職禮，潮州之寶饒宗頤都有現身。
玩具大王蔡志明係架己冷，佢同着得靚靚嘅太太蔡李惠莉拍拖前來，蔡志明好開心咁話，佢啱啱收購咗喜運佳錶行嘅控股權，實行將自己收藏靚錶嘅嗜好變成一盤生意。
呂志和太太（左）同新抱都着旗袍，着出兩種韻味。
蔡志明太太李惠莉雖係山東人，但好享受做潮州新抱，好鍾意潮州菜。
潮州之寶饒宗頤（右二）一現身會場，眾人即刻上前寒暄同攙扶。
潮州商會會長陳幼南（右二）同幾位副會長張成雄（右一）、廖鐵城（左一）同周振基（左二），致送饒宗頤墨寶《太和》畀中聯辦主任彭清華（中）。