政情：搞搞政：葉劉田二少磨合需時
新民黨成立，葉劉淑儀同田北辰呢對新歡亦開始新婚燕爾嘅磨合期。黨主席葉劉尋日拖住兩位副主席同記者聚會，田二少呢位新寵好主動，同葉劉就新民黨路線、未來發展嘅表述，更好似同葉劉平起平坐咁。每對新婚夫婦都要經過一段時間磨合，佢哋呢一對睇怕都少不免。
兩小時嘅聚會中，田二少多次就新黨路線同發展問題侃侃而談，滿腹大計，發言時間就算唔多得過身為主席嘅葉劉，亦絕對可以講係平分秋色。葉劉喺座上批評功能組別冇認受性，新民黨冇興趣競逐，語音未落，田二少即刻插嘴搶答，話功能組別唔係制度嘅問題，而係睇當選者嘅政治理念係好定壞，似乎對主席之言唔係全面認同。
呢對新歡言語間時有各自意見，問到另一副主席史泰祖，驚唔驚兩位正副主席同僚都咁「硬淨」，開會成日嗌交，本身係醫生嘅佢話有時火星撞地球都唔係唔好，從醫學角度嚟睇，有不滿情緒宣洩出嚟，總好過谷住壞身體。不過，尋日田二少搶答嘅時候，葉劉都一副小女人嘅樣微笑靜聽，蜜月期啱啱開始，照計都冇咁快火星撞地球嘅！