政情：民主阿婆撐D姐係好官
「百足之蟲，死而不僵」，完全就係講緊退休後續對本港政事指指點點嘅前政務司司長「民主阿婆」陳方安生。佢尋日同傳媒見面，席間唔少得向政府開火，一時質疑亞運會嘅成本效益，一時又話關愛基金影響其他籌款活動，不過最特別係呢位民主阿婆竟然死攬近日畀人批評到體無完膚嘅公務員事務局局長「D姐」俞宗怡，點解咁奇怪？
D姐同民主阿婆私交甚篤，因為佢係當年以民主阿婆為首嘅「手袋黨」成員之一。上禮拜三，即立法會發表梁展文事件調查報告當晚，民主阿婆就約咗D姐食飯，不過佢唔係勸佢辭職，而係叫D姐唔好睇報紙，費事搞到自己咁煩喎。
除咗叫D姐做鴕鳥之外，民主阿婆仲力撐對方係好官，又扮晒代表咁話市民唔係要D姐辭職。相反梁展文就冇咁好彩獲民主阿婆厚待，佢話如果有足夠證據，應該交畀執法機構跟進，仲話事件反映市民覺得官商勾結嚴重。如果D姐唔係批准梁展文做工，梁展文都唔會搞到要面臨執法機構跟進啦，民主阿婆袒護老友，都要講吓邏輯啩！