政情：阿John今季首贏頭馬
馬會前主席陳祖澤（John）今年七月卸任後，全職歎世界，前晚快活谷跑馬，佢嘅愛駒「好運得福」喺天寒地凍兼落雨嘅環境下跑第一，仲以半個身位跑贏醫管局主席胡定旭嘅愛駒「心路」。
今次係阿John今季首次贏頭馬，喜獲三十六萬元獎金，當晚見佢相當風騷，拖住太太一齊落場威威。阿John笑笑口咁話，會將筆獎金當做聖誕節禮物，至於會唔會當禮物轉贈老婆，咁就唔知嘞！
前晚阿John仲喜獲一位九龍華仁書院師兄捧場，由於當晚落雨，阿John都唔敢叫師兄落注，但佢師兄最後都投注五十蚊位置以示支持。記得阿John退任馬會主席時，曾講笑希望退落嚟之後，養馬運會好啲，依家中晒啦！
阿John（右一）前晚贏頭馬相當風騷，拖住太太（左二）一齊落場拉頭馬。