政情：查數兩巨頭遊英倫取經

立法會政府帳目委員會同審計署走埋一齊會點？唔使諗都知會查餐死啦！不過，世事無絕對，嚟緊呢兩個組織就決定攜手遊埠，去英國向當地嘅同類組織取經，帳委會呢次仲係主動邀請審計署署長鄧國斌一齊去添！有口痕友話，帳委會主席黃宜弘同鄧國斌都係專責查人哋數嘅人，今次去英國每個人要使成七萬幾蚊，佢哋一齊去，咪唔使你查我、我查你囉！

不過呢個藉口有幾成真冇人知，但佢哋兩個組織就實在惹火，周不時都有明槍暗箭或畀人抽秤，譬如質疑審計署查埋晒啲芝麻綠豆數，或者質疑立法會帳委會運作太政治化、大多事後孔明，佢哋為咗自我完善，去觀摩吓其他地方嘅帳委會點運作都係好嘅。

坐商務位破津貼上限

佢哋初步擬訂出年三月十九號出團，訪問英國倫敦同愛丁堡嘅相關機構，八日行程每人預算上限要成七萬幾蚊。點解咁貴？因為呢個價格係計坐飛機搭商務客位，不過呢筆數已經超過立法會每個會期為議員提供嘅海外職務訪問津貼上限，所以秘書處都打咗另一個價，搭經濟客位就盛惠三萬零五百。不過，唔知啲議員到時揀邊款呢？

唔講唔知，今次如果成行，將會係帳委會成立以嚟首次外訪，初步行程係先去愛丁堡同蘇格蘭審計委員會同審計處，然後飛倫敦，觀摩英國帳委會嘅公開聆訊，再同國家審計局嘅官員見面。除帳委會七個成員可以參加外，亦歡迎其他有興趣議員加入。

撞正財會預算案會議

不過呢個歷史性嘅取經團分分鐘會泡湯，事關佢哋嘅出團日子，咁啱得咁蹺踏正立法會財務委員會一連三日、辯論一年一度財政預算案嘅特別會議。按以往慣例，議員大都會出席，但外訪期又要就英國嗰邊，唔可以隨便改，所以帳委會處女行成唔成，依家真係好難講㗎。