短打長擊：信口開河脫離現實

行政會議成員張炳良，早前應邀到天水圍出席活動。難得下情可以上達，居民忙着請願吐苦水。張炳良也許一朝富貴，忘記了低下階層市民的艱辛苦困，尤其是悲情城市天水圍。他也許自以為「身正不怕影子斜」，自我感覺良好便信口開河，猛讚天水圍個名好靚，好似「天與水之間」，有啲似「香格里拉」，希望大家拋棄悲情，重新返去呢個咁靚嘅名度繼續努力喎。

張炳良如此高格調，難怪被譏為「讚錯圍城擦錯鞋」。天水圍有很多新移民，不少都有家庭問題，而且位置偏遠，交通不便，出市區打工並不划算，形成就業困難。唔該張炳良做足功課先至好發言，咪亂咁擦鞋。

為政必須務實，切勿學鬍鬚曾「人在其位，不謀其政」，開口埋口就問：「如果你係我，你會點制訂下年度嘅財政預算案呢？」如果我係你，眼見民間老百姓生活在通脹的水深火熱之中，都唔使講咁多嘢，一招「開倉派米」足矣！愈問得多愈顯示你唔想「繁榮共享」，一味做守財奴，應使唔使！

有個笑話：一家三口，老婆為家務所累，乃書「收拾家務，人人有責」貼在牆上。兒子見之，提筆將「人」字加一橫，變成「收拾家務，大人有責」。丈夫見之，再加三筆，改為「收拾家務，太太有責」，老婆一見為之氣暈。

家務可以推來推去，如太極推手，之不過身為財爺，高薪厚祿，位高權重，一年嘅成績表是否亮麗，就靠你平時密密做工夫，閒時做家課，而唔係如幻影幽魂廢問「點制訂下年度嘅財政預算案」！