公眾街市爛攤子 藥石亂投添煩亂

香港寸土尺金，鬧市旺舖嘅租金更係高到飛起。不過亦唔可以一概而論嘅，如果遇到一個大方嘅業主，講唔埋租金超平。你哋會問，咁嘅業主去邊度搵呀？遠在天邊，近在眼前，香港政府就係一個。

唔講真係唔知，原來食環署轄下公眾街市，逾六成攤檔租金低於市值，其中兩成以上攤檔租金低於市值嘅一半。更奇嘅係，攤檔同攤檔之間嘅租金竟然相差幾十倍，最高九千元，最低只係一百元。

唔怪之得審計署開炮，勁批食環署管治街市不力，造成公帑大量流失。食環署急急腳補鑊，建議向租金低於市值嘅攤檔加租，仲話要用三年時間追上市值咁話。

立法會尋日開會討論食環署嘅方案，議事堂外幾十個街市商戶拉隊請願，反對一刀切加租。佢哋七情上面，嗌到聲都沙埋。又難怪佢哋咁勞氣嘅，現時街市人流稀少，生意難做加上通脹加劇，商戶早就冇啖好食，家陣又失驚無神大幅加租，佢哋有乜法子唔反彈呀。

不過，現時嘅租金制度如果唔改變，唔單止庫房會大出血，仲會令商戶分化，所以對租金低於市值嘅攤檔加租係無可厚非。問題係，家陣公眾街市問題多多，已經積重難返，唔係加租就可以解決嘅。

因乜事咁講嘅呢？嗱，照理講公眾街市租金咁平，商戶打崩頭爭住租至係㗎，點知唔係，好多公眾街市十室九空，好似旺角有個街市，走剩五十個攤檔商戶，街市入面水盡鵝飛，有啲攤檔成日都冇人光顧。

梗係啦，你去街市外面睇吓，排檔成行成市，各種貨品應有盡有，生意不知幾紅火，買嘢使乜行入街市呀。加上街市內部日久失修，地下又濕又滑，冷氣又唔夠凍，總之入去就周身唔聚財。唔怪之得有人話，市民入街市都係為咗光顧洗手間啫。

近年公眾街市嘅空置率愈嚟愈高，食環署開頭詐睇唔到，直到審計署狂批，佢哋先至病急亂投醫，為咗降低空置率竟然以超低租金吸引街上攤檔遷入街市，庫房為此每年收少億幾元。可惜銀彈戰術無補於事，仲搞到矛盾重重：舊商戶眼見政府大細超，固然深深不忿；新商戶遷入街市後生意反而一落千丈，更係怨言多多。政府兩頭受氣，惟有自嘆倒楣。

講真，時至今日公眾街市已淪為爛攤子，唔係話加租就可以執番掂嘅。如果搞得唔好，仲會趕走更多商戶。照咁落去，唔使幾多年，公眾街市就會變成香港人嘅集體回憶嘞。叮！