政情：吳方笑薇打工業家荷包
香港青年工業家協會前晚喺會展舉行新一屆就職晚宴，專登撥出一角畀地球之友募捐，地球之友中國事務委員會主席吳方笑薇（Mei）眼見賓客魚貫入場，但係坐咗半粒鐘依然未發市，始終冇人肯高抬貴手做善事，睇嚟打人荷包真係唔易。直至協會榮譽顧問王敏剛出現，一馬當先捐出一百蚊人仔，廠商會副會長羅富昌更豪，捐夠五百蚊，副會長李秀恆等人亦加入響應，令阿Mei笑逐顏開。佢呼籲大家改變送花籃文化，改以捐款方式做賀禮，話更有建設性喎。
王敏剛（左）帶頭捐出一百蚊人仔，令吳方笑薇（右一）非常感動。