政情：梁栢賢被認錯係藝人
上月中上任醫管局行政總裁嘅PY梁栢賢，知名度愈嚟愈高，出街都有唔少市民認得佢，同佢打招呼，但最近就搞出一個笑話。話說PY最近有朝早出街，撞見一對賣旗嘅母子，媽媽見PY就同個仔講：「呢個叔叔好熟面口喎！」但就叫唔出PY個名，唔知係咪喺電視見過，媽媽竟然指住PY同囝囝講：「佢梗係藝人嚟嘞，叫藝人叔叔啦！」雖然令PY啼笑皆非，但都照畀錢買旗。
其實，PY都唔係第一次畀人認錯，○三年沙士爆發時佢出任衞生署副署長，久唔久就同當時醫管局嘅專業事務及人力資源總監高永文公開亮相解釋疫情。有次PY戴住個口罩同老婆去超級市場買嘢，排隊畀錢時，前面個市民竟然話認得佢，但就大叫佢做高永文，仲話：「你係高永文，戴咗口罩我都認得你！」
PY做咗行政總裁後忙到飛起，但佢都好安慰，皆因佢首次主持嘅員工大會，出席員工多到成個禮堂都唔夠坐，比以前坐得一半人多成倍，反映員工對佢好有期望。
梁栢賢（左）話亦曾經試過畀人認錯係高永文（右）。 （資料圖片）