政情：搞搞政：怪醫倡標準工時訂高些
啱啱先拆掂最低工資，轉個頭政府又話要研究標準工時，唔少商界議員都唔敢明刀明槍反對，以免再做箭靶。向來力撐標準工時立法嘅醫學界代表「怪醫」梁家騮日前忽然獻「怪招」，建議將標準工時先訂喺高啲嘅水平，聲言咁做可包保商界落疊，亦令佢哋唔使再做醜人喎！
怪醫喺議會內外早已多次叫政府正視依家醫生「有返工冇放工」嘅問題，當然想標準工時盡快立法。面對商界同勞工界傾唔掂數嘅情況，佢話政府制訂首個工時水平時，可以唔使訂喺勞工界提倡嘅每個禮拜四十四個鐘，而中間落墨訂喺較高水平，好似五十幾個鐘咁，相信可以將對商家嘅影響減至最低，對商界背景嘅政黨嚟講亦係可以接受。
依家喺醫院工作嘅醫生工時極長，閒閒哋一個禮拜要返成六十幾七十個鐘，所以即使將標準工時訂喺五十個鐘，對醫生嚟講已係「皇恩浩蕩」，咁怪醫都算係「成功爭取」降低工時，對選民有交代啦！
