政情：縱橫遊搵第二代接班
以營辦日本團起家、有三十幾年歷史嘅縱橫遊，部署由第二代兄妹檔接棒。太子爺CN袁振寧同太子女Jessica袁愷瑩尋日首次同傳媒茶敍時，率先宣布喜訊，就係縱橫遊獲日本東北七縣指定為香港區嘅合作夥伴，確立咗旅行社喺日本經營多年嘅江湖地位。
CN主要負責公司內部事務，妹妹Jessica就係公司嘅業務拓展經理，主要對外。Jessica係靚女一名，喺倫敦修讀心理學，學成後從事保險業，近一年先返旅行社打理業務，佢同時下年輕人一樣鍾意旅遊，尤其鍾愛日本。
CN都係半個日本通，佢介紹咗一間喺札幌狸小路嘅居酒屋畀記者，佢話間食肆內部裝修好特別，以木為主，提供數款自助小食，但冇標價，老闆視乎客人拿取嘅分量收費，連飲啤酒兩人消費萬幾日圓，都好抵喎。
袁振寧（左）同袁愷瑩兄妹成為縱橫遊嘅第二代掌舵人。