政情：肥亨資助貧童歡度聖誕
臨近聖誕節，可能大家啲慶祝活動多到去唔晒，但對於一啲貧窮家庭嚟講，能夠參加一個派對已相當滿足。中策集團主席馬時亨同喺基督教團體「全城更新」任主席嘅太太王培琪，喺舊年聖誕前夕邀請五百名貧窮兒童到馬灣「挪亞方舟」享用聖誕大餐後，今年再接再厲兼加碼，資助七百名貧窮兒童同其家人去挪亞方舟玩。
肥亨話今年嘅送暖活動叫「喜悅之聖誕2010全城愛無限」，喺呢個禮拜六（十八號）舉行，節目包括藝人歌舞表演、報佳音同聖誕生命樹亮燈等，仲預備咗一千份食品禮物包，派發畀獲邀參加嘅七百名嚟自十八區嘅貧窮兒童，希望大家度過一個幸福又愉快嘅聖誕節。不過，佢話當日有要事離港，所以未能參與活動，屆時就要勞煩太太獨擔大旗嘞。