政情：鬍鬚曾宣傳片玩出禍

雷曼事件擾攘兩年都未解決，大家喺中環仍然見到一班苦主喺街頭抗議，尋日有幾個苦主就趁住行政會議開會，去政府總部請願。

花巧嘢浪費公帑

話說兩個苦主準備咗三封信，預咗畀政務司司長唐唐、財爺鬍鬚曾同財經事務及庫務局局長「傻強」陳家強，希望佢哋可以跟進未解決嘅雷曼賠償問題。不過三個人未到，教育局局長孫明揚咁啱經過示威區，兩名苦主對住佢大叫：「曾生，雷曼事件未解決呀！」孫公望咗佢哋一眼，當聽唔到就閃人，兩名苦主先驀然醒起叫錯人，萬分無奈。

我哋問番苦主，佢話見到孫公有兩撇鬚，好自然咁當咗佢係鬍鬚曾喎！鬍鬚曾啱啱推出嘅財政預算案諮詢宣傳片，搵咗老中青嘅演員黐撇鬚扮財爺講意見，搞到好似幫自己做形象工程咁，唔知兩個苦主係咪受段片影響先叫錯人，若果係真嘅話，咁段宣傳片就玩出禍喇！好心鬍鬚曾就做多啲實事啦，搞埋呢啲花巧嘢，簡直係嘥晒納稅人啲錢呀！

煲呔曾自欺欺人

之後苦主終於等到鬍鬚曾同傻強喺另一邊停車場落車，繼續向佢哋求救，不過兩個人聽到都當聽唔到，急急腳走去開會，連信都冇接。好唔容易等到唐唐嚟開行會，苦主們同佢訴求，要求政府幫手跟進賠償問題，點知唐唐竟然反問：「乜仲（雷曼事件）未解決咩？」等到煲呔曾嚟到，佢竟然同苦主講：「解決晒啦！」講到好似兩個苦主喺度呃佢咁，真係請完願仲嬲多幾錢！

老實講，雖然唔少迷債苦主獲得賠償，但始終未賠足，加上買咗股票掛鈎票據（ELN）嘅苦主到依家一個仙都未拎到，話雷曼事件解決晒，簡直係十級自欺欺人！不過苦主們見到政府高官咁嘅態度，應該都明白就算對住邊個官請願都好，訴求都係石沉大海，所以求人不如求己，諗過其他方法據理力爭好過靠政府啦！