創造就業得把口 後生搵工難上難

經濟雖然復甦，但失業率冇改善，香港地搵工難，後生仔女搵工仲難，低學歷青少年搵工直頭難上加難。

家陣通街仔妹無所事事，原來佢哋唔係食飽無憂米，實在係無碇搵米。有慈善機構調查發現，受訪嘅十八至二十五歲中五學歷以下青年入面，約有七成三就業遇到困難。原因包括適合工種有限、技能不足、唔夠「哥利」冇人請等等。

書中自有黃金屋，希望讀多啲書自我增值又點？都唔掂。六成受訪者話冇繼續進修，唔係唔想讀，除咗工作時間唔穩定之外，最大問題係負擔唔起。至於港府嘅毅進、青見、展翅青少年就業計劃，原來又係嘥氣，超過一半受訪市民話冇參加，理由好簡單，因為課程認受性低，幫唔到啲乜。

講開課程認受性，太一叮真係無名火起。政府推出計劃嗰陣吹到天花龍鳳，話有助就業，點知通通得把口，連政府部門自己都擺烏龍唔認數。呢，有位市民會考食「鴨蛋」之後，發奮完成咗資歷等同會考五科合格（包括中英文）嘅毅進課程，今年九月應徵觀塘民政事務處一份學歷要求同毅進資歷相符嘅職位。但佢最後都被拒絕，理由居然係「未符合職位要求」。再三追問，處方至承認「搞錯咗」，以為毅進課程唔夠班，卒之白白錯失咗機會。

叮！政府簡直係靠害！雖然近排就業情況保持平穩，失業率變化唔大，但青少年失業率持續高企，今年第三季仍然高達百分之十四點八，近五萬名青少年搵唔到工，當中大部分屬於低學歷。政府部門帶頭歧視，青少年又點可以掌握自己嘅命運吖？

新人搵工處處碰壁，失業人士求職同樣困難重重，政府有乜好橋？勞工處今日起推出「就業導航試驗計劃」，預計可以有二萬二千位失業求職人士受惠。聽落又幾盞鬼噃，有乜料先？

嗱，只要接受完「個人化就業指導」，搵一份月入唔超過六千五百蚊嘅全職長工，獲聘返工第一日可以申請五百蚊「工作鼓勵金」，做滿一個月可申請一千五百蚊，做滿三個月可加碼申請三千蚊。

唔係潑冷水，政府分分鐘好心做壞事。好簡單，失業人士分成兩類，一類好想搵工但係搵極都搵唔到，如果市道旺，有工開，唔使「導航」都撲住去做；另一類就係好食懶做嘅寄生蟲，諸多藉口唔肯搵工，等老竇老母養，無論點「導航」都唔會郁。

政府振興經濟不力，冇辦法提供足夠就業機會，惟有做吓騷，整幾招花拳繡腿敷衍市民囉。計太一叮話齋，最需要導航嘅唔係失業人士，而係一班冇腦嘅高官。