政情：賭王宴請老友賀受勳

病愈復出嘅賭王何鴻燊，近日再度活躍，繼日前現身銀幕呼籲人捐錢支持東華籌款，尋晚以主人家身份，喺酒店宴請城中富豪老友食晚飯，賀佢攞大紫荊勳章，出席晚宴嘅有新世界主席鄭裕彤及公子鄭家純、合和主席胡應湘、卓能集團主席趙世曾及千金趙式芝、利孝和夫人，同埋民政事務局前常秘「媽打」李麗娟等，而一向愛熱鬧嘅賭王認得晒所有賓客，更逐一抱抱、傾偈。

賭王尋晚七點喺淺水灣大宅出發，戴咗頂帽，心口掛住大紫荊勳章好搶眼，由二房子女包括超鳳同保鏢陪同下抵達酒店。人逢喜事，賭王面色睇落紅潤有光，精神奕奕。佢見番咁多老友，顯得好雀躍，喺晚宴上致辭多謝大家，中氣十足，回復昔日談笑風生嘅風采。晚宴高潮，賭王更攞起酒杯祝酒，但就冇飲酒。

同賭王相識幾十載嘅趙世曾送上鮮花，逗留一小時後離開。兩人年幾冇見，到底傾乜？趙世曾笑騎騎咁話：「佢（賭王）成日話我有一千個女友喇。」睇嚟賭王依然好生鬼。眾人歡聚到九點四十五分左右散席，二十幾個保鏢護送賭王返屋企休息。

晚宴上未見四太梁安琪，但佢另有重任，下晝現身沙田馬場，為賭王愛駒「爆冷」出戰國際賽打氣，仲帶埋囡囡超欣。「爆冷」最後三甲不入，四太仍保持笑容，輸贏對四太嚟講只係平常事。