政情：撐最低工資＄33潘佩璆擺親家上枱

立法會議事廳內其中一個戰場係本港首個最低工資水平，勞資雙方嘅議員為二十八蚊時薪水平開戰，而前日由香港青年協會搞嘅「青年立法會會議」，由一班十幾歲嘅中學生模擬立法會開會情況，亦觸及呢個火辣議題，當日擔任嘉賓嘅立法會議員咁蹺分別代表勞工界同工商界，佢哋就係工聯會嘅潘佩璆同身兼富貴黨主席嘅劉健儀嘞。

潘醫生同班中學生分享時提到，自己係聯合醫院精神科顧問醫生，睇落好似唔屬於基層，但自從加入工聯會後，多咗好多機會接觸基層工友同市民，令佢深切體會到基層市民嘅苦況同壓力，令佢下定決心幫一啲基層工友爭取權益。

或代表工聯會選港島

提到最低工資，潘醫生突然又有嘢爆。原來佢親家係經營食肆嘅，實施最低工資難免對親家造成影響。佢承認親家依家的確為點樣配合最低工資而大傷腦筋，但潘醫生仍然堅持最低工資係必須嘅，因為呢個政策等同將社會財富再分配，係一個公義社會必須嘅條件，嚟緊仲一定會爭取埋標準工時添。

喺活動後追問潘醫生，佢強調親家絕對冇向佢施壓或者吐苦水，因為大家都知道佢喺呢件事上立場絕對堅定，即使呻都冇用。咁即係話，潘醫生好似鐵人咁企硬要三十三蚊，二十八蚊no way，就算親家都冇面畀。好彩嘅係，佢親家嘅食肆生意近年都算唔錯，所以即使對呢個政策有憂慮，亦一定會守法出足糧喎！

雖然潘醫生係首次參加「青年立法會會議」，但佢話平時都相當鍾意同年輕人溝通，仲猛讚班參加者，話佢哋嘅表現出乎意料咁好，令人吃驚。

從政者除要立場堅定外，仲要識得同年輕人溝通，盛傳潘醫生下屆有機會代表工聯會喺港島出選立法會議席，依家當然要凸顯自己嘅鮮明立場啦，最終成唔成功就要睇佢嚟緊兩年嘅表現喇！