工展今猶在 只是朱顏改

一年一度嘅工展會尋日開鑼，吸引大批市民入場掃貨，場內人頭湧湧，不知幾熱鬧。主辦單位估計，今年工展可以吸引破紀錄嘅二百五十萬人次入場，營業額可望比舊年升兩成至六億元。總而言之，即係旺丁又旺財咁話。

不過，大家唔好以為香港真係咁好景，今年工展會可能旺丁又旺財，係有原因嘅。事關通脹殺到，百物騰貴，工展會正正係基層市民掃貨抗通脹嘅好機會。呢，唔少參展商搞噱頭，推出一蚊優惠貨品，吸引大批市民排隊爭購，有人慨嘆，內地通脹升溫，搞到柴米油鹽樣樣貴，擔心加價潮好快打到嚟香港，所以專登推住車仔入場掃貨，慳得一蚊得一蚊吖嘛。

講開又講，工展會眨吓眼已伴隨香港走過七十幾年，成為幾代人嘅集體回憶。雖然期間曾因各種原因幾度停辦，但終於可以浴火重生，證實香港人頭腦靈活，轉數快，應變能力強，真係抵讚！

有人話，工展會嘅歷史反映香港歷史，真係一啲都冇講錯。不過咁，今時唔同往日，滄海桑田，時代變遷，工展會雖然盛況不減當年，工展小姐亦依然咁嬌俏，但大部分展品已經唔係香港貨，「Made in Hong Kong」嘅商標買少見少。正所謂年年歲歲花相似，歲歲年年人不同，嚴格嚟講，依家嘅工展會應該叫展銷會先至啱，係各地產品嘅大雜燴。

係人都知，香港工業早已式微，好似高官話齋，香港唔會返去穿膠花年代㗎喇，所以咯喎，邊度仲有本地嘅工業產品吖。問題係，香港唔再穿膠花，咁靠乜嘢呢？靠所謂轉危為機嘅六大產業？唔好玩啦，六大產業吹咗兩年，依家仲係冇影冇蹤，最巴閉係醫療同教育產業，亦只係撥出幾塊地皮咁大把，叮！

所以話，港府高官冇嘢叻，最叻就係假大空，乜嘢中藥港、科技港，講到天花龍鳳，到頭來影都冇，咪話太一叮批死呀，所謂六大產業都係咁上下貨色，信半成都死。工展會嘅變化，正正反映香港工業嘅沒落，兜兜轉轉，香港始終都係要靠炒樓炒股。港府話喎，咁先至係國際金融中心，可以媲美紐約同倫敦添，真係唔知嘅嚇死，知嘅就笑死。

香港工展今猶在，只是朱顏改。問君能有幾多愁，恰似一江春水向東流。老一輩想重溫「港人用港貨」嘅黃金歲月，睇嚟惟有摷本舊相簿出嚟緬懷吓囉。