政情：搞搞政：莎姐發功暗批哪吒田二少

富貴黨因為田二少田北辰及哪吒方國珊退黨搞到風雨飄搖，連已經淡出政壇嘅兩大黨元老田北俊、莎姐周梁淑怡都要復出，莎姐尋日出席個電台節目時，講到兩人忽然發功，既為黨主席劉健儀（Miriam）毫無保留撐哪吒講句公道話，又唔點名話罷食大家樂梗係可攞到頭條新聞報道同風頭喇，矛頭雖然冇指田二少，但一掌打出去，目標人物都夠傷喇！

莎姐仲話：「你下下講到要罷食，係好容易出位，又好容易搶到頭條、掌聲，但同我哋一貫處理矛盾嘅手法不同囉！」雖然佢冇指名道姓，但除田二少外，富貴黨當時好似冇人話罷食噃？

講完呢一筆，佢嘅話題又轉到哪吒身上，坊間有傳經濟動力有意拉攏哪吒過檔，莎姐就代主席Miriam抱不平，話以前只要哪吒出到聲，Miriam就會親自落將軍澳撐佢啲活動，畀足資源佢，點知哪吒今次無預警退黨，Miriam真係好傷心。莎姐仲提到哪吒過去好少參加黨內會議，到宣布退黨時先至話有好多不滿，講得雖然平和，但都睇得出莎姐對件事好有意見。