政情：林公公教soundbite識講唔識做

政治係妥協嘅藝術，更係將高深問題平民化、僵硬政策通俗化，從而取得良好結果嘅藝術，不過，特區政府官場中懂得呢門藝術嘅人真係唔多，出名係人肉錄音機嘅政制及內地事務局局長林瑞麟尋日出席個電台節目時，就教導政壇新秀從政要識運用「雞精版」精句，即係簡單明瞭畀到訊息市民，不過，由肥雞到雞精，必須經過工序複雜嘅提煉，林公公識得教人，唔知佢推銷政策嘅手段屬於肥雞級定雞精級呢？

叫政壇新丁 明白乜係雞精

喺立法會聽過林公公答辯嘅人，都唔難了解點解佢會畀封做「人肉錄音機」，因為佢講嚟講去只得一條口徑，問佢一百個問題，佢答嘅都係一個答案，少啲耐性，真係分分鐘頂唔順拍枱走人㗎。以為佢係先天不足喇，尋日聽佢喺電台節目教一班政壇新秀說話嘅技巧時，教導佢哋從政一定要有「雞精版」soundbite，即係「精句」，畀電子媒介攞嚟左播右播嗰一兩句，因為咁樣一針見血，既吸引人，又唔會流於口號。

佢仲講番三十幾年前，佢做緊房屋署時代表政府見壓力團體，啲團體代表話草根階層嘅單身人士捱到「攤攤腰」，令佢印象非常深刻，之後開始成立一人家庭都可以申請公屋嘅計劃，幫到幾多得幾多，諗真啲，佢只係借呢個例子嚟為自己當年推出嘅政策貼金啫。

跟住佢又舉賑災活動嘅「站起來」，或者民主黨就政改提「一人兩票」嘅新構思等作說明，等啲新秀明白乜嘢叫「雞精」。不過，林公公大賣「雞精」嘅時候，似乎唔記得咗佢近年嘅表現，或者呢啲就係識講唔識做囉！