政府把愛關起 長者繼續捱窮

內地網民票選二○一○年最具代表性漢字，「漲」字得票遙遙領先。計太一叮話齋，內地通脹雖然嚴重，但打工仔嘅收入增長都好快，最慘嘅係香港嘅基層大眾，一路睇住物價愈嚟愈貴，一路睇住人工愈嚟愈縮，如果喺香港進行同類選舉，大熱門除咗「漲」字，仲有一個「窮」字。

呢，話口未完，又有團體公布調查結果，超過八成市民認為香港嘅貧富懸殊問題嚴重，近三成認為非常嚴重，近九成認為貧富懸殊會加重社會怨氣，五成認為政府推出關愛基金解決唔到問題。

調查結果雖然驚人，市民亦都見怪不怪，香港嘅貧富差距冠絕全球已發展經濟體吖嘛，在職貧窮人數不跌反升，係人都見得到啦，只有政府官員詐唔知，一時又話貧富懸殊唔算嚴重，一時又話收入低過綜援先算貧窮，卒之激到市民怨聲載道，又整色整水推出個關愛基金應酬大家。

不過搞笑嘅係，全港窮人超過一百二十六萬，關愛基金只得一百億元，而且政府出一半，仲要向商界科水一半，扶貧扶到咁縮骨，真係畀佢吹脹。太一叮思疑，政府設立關愛基金，其實係「把愛關起來」嘅意思，係絕對唔可以畀市民感受到嘅！

講開窮人，貧窮長者毫無疑問係最淒涼嘅一群。佢哋人又老，錢又冇，如果唔肯申請綜援，每個月就得嗰區區一千元生果金，為咗善用呢筆有限錢，唔少長者選擇返內地養老。但荒謬嘅係，原來老人家長年住喺內地，係無得攞生果金嘅，雖然市民嘈到拆天，政府依然唔肯全面撤銷生果金嘅離港限制，只肯由每年最少留港九十日減到六十日，受惠長者總共只增加二千人。

政府把愛關起，長者繼續捱窮。早排國際長者日，大批長者帶埋枕頭地蓆到禮賓府門外紮營請願，諷刺政府要長者定期返香港報到，等如逼老人家瞓街，做游牧民族。而勞工及福利局局長張建宗就話，要等生果金嘅司法覆核明朗化，當局先會決定下一步工作，仲堅持減至留港六十日最恰當喎。

唉，講起就勞氣，須知生果金代表市民對老人家嘅敬意，畀得疏爽啲係冇人反對嘅。大家唔明嘅係，政府既然容許退休公務員喺外國攞長俸，點解唔畀老人家喺內地攞生果金呢？

更何況，官司係一回事，敬老係另一回事，如果政府喺司法覆核判決前全面撤銷生果金嘅離港限制，就係主動敬老；如果等到判決後先嚟跟進，就顯得唔情唔願。兩種做法，結果可能一樣，但性質就好唔同。

太一叮忠告特區官員，快快趣趣從善如流，立即出手扶貧安老，須知敬老要用心，扶貧靠行動，唔係靠把口齋噏呀，叮！