政情:高錕為光纖聖誕樹亮燈

政情:高錕為光纖聖誕樹亮燈

九龍塘又一城商場豎立咗一棵七十呎高、橫跨幾個樓層嘅光纖聖誕樹,原來係由高錕慈善基金籌辦,除咗紀念「光纖之父」高錕嘅卓越成就之外,仲因應高錕患上腦退化症(前稱老人癡呆症),利用聖誕樹籌款以研究有關病症。高錕夫婦尋晚為光纖聖誕樹主持亮燈儀式,大會喺儀式前千叮萬囑在場記者同圍觀人士,喺拍攝時嚴禁使用閃光燈,避免影響高錕。

傳媒自律唔用閃燈

高太黃美芸話高錕患有腦退化症,腦部同眼睛有密切關係,遇強光會影響情緒,所以希望大家切勿使用閃光燈。現場所有人都好尊重高錕,一下閃燈都未出現過,所以高錕喺整個儀式都笑容滿臉。黃美芸坦言,相信高錕未必記得自己發明過光纖,但面對光纖聖誕樹,相信會勾起以往回憶都未定。問佢哋點過聖誕節,黃美芸話喺香港簡簡單單食餐飯就算喎!

光纖聖誕樹下會安排聖誕老人同大家影相,每次六十元,善款會撥入基金作為研究腦退化症用途。而基金亦同時製作咗二十棵、每棵四十厘米高嘅小型光纖聖誕樹,全部由高錕親筆簽名,下月公開競投,底價為三千八百八十元,基金董事盧永仁希望各方善長多多支持。

高錕夫婦同盧永仁夫婦等人為光纖聖誕樹主持亮燈儀式。

光纖聖誕樹