政情:搞搞政:謝凌潔貞寸張建宗唔放假

政情:搞搞政:謝凌潔貞寸張建宗唔放假

做埋呢個禮拜勞工處處長之後,謝凌潔貞下個月十三號就調去教育局做常任秘書長,佢尋日同傳媒臨別茶敍時讚佢嘅頂頭上司、勞工及福利局局長張建宗記性好好,任何數字都準確無誤,又話:「我自己都已經好勤力,但局長係超級勤力。」搞到佢好自卑。

冇標準工時概念

跟住有記者話張建宗係一個好壞榜樣嘅僱主,因為佢成日都唔放假,謝太聽後笑一笑,跟住話唯一佢學唔嚟嘅就係局長唔放假瞓身做嘢,佢話點都要放假照顧兩個女,所以佢冇興趣做局長,仲慨嘆呢個世界真係天外有天、人外有人咁話。

聽完呢番說話,大家覺得謝太係讚上司,亦都寸咗上司,點解?事關依家張建宗負責研究標準工時,而佢成日都唔放假,意味佢本身都冇標準工時,亦即係冇相關嘅概念喇,咁又點會真正理解打工仔對標準工時嘅需要性呢?

下個月就去教育局,咁啱遇着審計署炮轟直資學校亂使錢,曾經做過教育統籌局嘅謝太好淡定咁話會搞得掂,因為當年就曾經處理過審計署話英基財政混亂,仲話審計署不時驗下身都係好事。

即將調職去教育局嘅勞工處處長謝凌潔貞,尋日同傳媒茶敍講感受。