政情：劉夢熊新西超級區會夢

全國政協委員劉夢熊近日喺「結石寶寶之父」趙連海案上不斷發炮，直斥係「司法史最黑暗一頁」，又反駁立法會金融服務界議員「金勞詹」詹培忠指為趙抗爭嘅人冇好下場嘅言論「值得商榷」。轉過背，金勞詹尋日突然喺報紙登全版聲明，暗批有政協委員「嘩眾取寵混個名堂，尋求個人名位」，喺聲明尾仲表明同劉夢熊道不同不相為謀，「劃清線界，從此割席」。

點解金勞詹突然咁激？尋日有消息傳出，全因本身從事金融業務嘅劉夢熊有意染指金融服務界，想借趙案「響朵」。不過，金勞詹話同劉夢熊劃清界線，全因政見相悖，並冇私怨，仲斬釘截鐵指劉夢熊唔會選金融服務界，而係去直選！咁激？我哋向劉夢熊求證，佢嘅答案係：一定唔選金融服務界，如果退一萬步講，佢真係要選，都選變相直選嘅功能界別區議會超級議席！

到天水圍接觸居民

劉夢熊否認借趙連海案抽政治油水，又話至今冇諗過選立法會；但另一方面，佢對選超級議席要喺明年先當選區議員，卻又早有腹稿喎，就係希望進軍新界西。佢話七三年佢游水來港，孑然一身，「一條泳褲起家」，依家做到上市公司主席、清華大學高級講師，當年佢喺天水圍附近尖鼻咀偷渡上岸，今日飲水思源，所以打算搵發叔穿針引線，到天水圍接觸居民，以佢嘅親身經歷，破解居民嘅悲情。係咪進軍立法會？畀多幾個月時間睇下咪知囉！