政情：黑英借網民鬧爆議員

天文台前台長「黑英」林超英早前以校友身份，就母校英皇書院縮班事件，喺佢嘅個人網誌開火，炮轟政府違反公義，剝削咗基層學生入讀優質學校嘅機會，仲先後多次同教育局局長孫明揚隔空罵戰。

結果係點？孫公態度強硬，仲推出強化版「6+3」措施，畀參與優化計劃嘅學校，可以連續六年保留六個臨時教席，再用三年時間逐步處理超額教師；又以連續五年，每年可獲二十五萬元額外津貼為誘因，吸引多啲學校參與。

孫公使出銀彈保飯碗嘅招數，孤掌難鳴嘅黑英似乎要改變策略，尋日喺佢嘅個人網誌度貼咗另一個網民嘅文章，仲話呢個網民好仔細咁研究過政府嘅文件，搵唔到講家長同學生利益嘅地方，只見到以金錢照顧業界利益嘅方案。

話政府耍弄文字遊戲

網民嘅說話同黑英不謀而合，黑英亦話政府新聞稿將「學界」同「學生」區別，好小心咁將「業界」講成為「學界」，避免觸動市民醒覺方案嘅真正焦點所在，係教育局繼「微調」之後，耍弄文字遊戲嘅又一例。

跟住佢仲節錄咗呢個網民篇文章，當中提到中學縮班加資助，清楚顯示咗政府點樣用市民嘅金錢，力保縮班影響教師嘅飯碗，嚟維持所謂嘅社會穩定，不致引起「社會動盪」。

呢個網民仲話：「如果『不縮班　社會動盪』，那麼，當市民最需要你的時候，被選民送進立法會的議員又在哪裏呢？他們又有否為家長們發聲呢？我似乎聽不到。如果你不為我發聲，我為甚麼要選你？」

嗱！雖則呢段節錄唔係出自黑英把口，但佢貼得上個人網誌，好明顯係認同呢個講法，亦即係黑英都好不滿班立法會議員冇代家長出聲，只係借網民把口鬧爆佢哋任由政府強行要中學減班。

其實網民鬧班議員呢段節錄仲有一段，就係「不是說說甚麼『爭取普選』、『為民請命』、『堅定可信』，我就會自動投你一票的，別做夢！」相信大家對呢幾個口號聽到爛，事關終日都掛喺班泛民主派議員口邊。點解黑英唔將呢段貼埋上網誌度？係咪唔啱佢聽呢？睇怕要佢自己先知嘞！