阿寶神勇奪冠軍 官員只識自貼金

三十七歲嘅香港單車運動員黃金寶，尋日喺廣州亞運會男子單車個人公路賽力壓群雄，蟬聯冠軍。今次比賽強手林立，年近不惑嘅阿寶要脫穎而出絕對唔容易，不過佢硬係唔信邪，奮力拚搏，一舉成功。阿寶，你係得嘅！

講到呢度，仲要讚讚「女版黃金寶」。二十四歲嘅黃蘊瑤喺女子單車場地記分賽不幸炒車，畀多架單車喺身上輾過導致肋骨骨裂。好個黃蘊瑤，強忍劇痛繼續參賽，最終勇奪銀牌。有人話，呢塊銀牌係用血淚打成嘅，不是金牌，勝似金牌。

男女版阿寶自強不息，永不放棄為香港爭得榮譽，用行動感動咗香港人。呢啲咪就係香港精神囉！

黃蘊瑤領獎時泣不成聲，在場者無不動容。佢喊唔係因為傷口發作，而係感慨萬千，事關呢塊獎牌實在來之不易。

講真，香港運動員要攞獎，比其他地區運動員艱難不知幾多倍。人哋有政府支持，生活無憂，訓練條件好，出外參賽亦係政府埋單。睇番香港，話就話有個精英運動員資助計劃，但孤寒到唔使恨。精英運動員分甲、乙、丙三級，丙級津貼金額最低只有每月三千九百元，同外判清潔阿嬸嘅人工差唔多。

講到外出參賽就更加慘情，政府最多出幾成旅費。有運動員為咗參賽，要節衣縮食大半年，你話係咪淒涼呢？唔怪得已故資深體育記者伍晃榮話：「睇見香港運動員好似孤兒仔咁去比賽，好心翳。」

好彩香港運動員逆境自強，一次次為香港爭得榮譽，迄今為止已喺本屆亞運攞咗八塊金牌，喺獎牌榜名列前茅。令人想起風之后李麗珊嘅名言：「香港運動員唔係垃圾！」

不過有人話，香港運動員雖然唔係垃圾，但就畀人哋當臘鴨。臘鴨平時掛喺牆上冇人理，有人想食先至切一舊嚟煮。港府對運動員亦係咁，平時任由佢哋自生自滅，佢哋憑自己努力出咗成績嘞，班高官就爭住去慰問，做騷做到七情上面，講到尾都係為自己貼金啫。

更令人反感嘅係，政府居然借運動員推銷申辦二○二三年亞運計劃。當局喺機場亞洲博覽館設攤位，以「微笑支持香港運動員」為名氹市民影相，事後就喺張相上強加「支持本港申辦亞運」字句。嘩，咁都得！

好多人都話，要發展體育事業，唔係靠申辦一次亞運就搞掂嘅，與其嘥大量公帑申辦亞運，不如增撥資源培養運動員，可惜政府硬係聽唔入腦，無他嘅，香港運動員唔係垃圾啫，香港官員係吖嘛。叮！