Sun世代：顧家潮爸有仔趁嫩生

在生活環境、經濟因素壓迫之下，香港人普遍遲婚，區議員徐海山卻是一個例外。他二十五歲結婚，現年三十五歲，大仔已經八歲半，細仔六歲半。「其實經濟唔係一個原因，結婚之後開支會少咗，成個人都穩定啲，我經常勸身邊嘅朋友早啲結婚生仔。」在徐海山眼中，家庭比任何事物都重要，為了家庭，他安於現狀，不介意只做一個觀塘區議員，暫時不作他想：「依家會盡量抽時間湊仔，等佢哋大個啲，再考慮其他發展。」

徐海山自己也承認，他是一個比較傳統的人。「家庭係好重要嘅，成家立室係必須做嘅，覺得啱咪結婚囉。」一九九八年從中大畢業，投入工作約兩年，結識現任太太，拍拖約半年就閃電結婚。他說：「我覺得結婚、生仔呢啲嘢都係要及早完成。有啲嘢有時間限制，尤其是小朋友，如果四十歲先有小朋友，到時都無力陪佢跑，諗住陪佢、帶佢都做唔到，所以我哋結完婚之後，各方面條件都OK，就決定生小朋友，依家就逐步教佢哋。」

工作之外就係陪仔

撇除區議員的身份，徐海山就是一名「湊仔公」。每天早上六、七點起床，揸車送兩個兒子上學，爭取時間見面；放學後陪他們參與課外活動、做運動。兩個囝囝同時愛上打冰上曲棍球，每周練習三、四日，直至晚上八、九點才回家，徐海山全程奉陪，「成個星期咁就過咗。」「你問我工作之外有咩活動，呢十年八載只得一樣嘢，就係陪仔、教仔。」言語之中，流露出身為父親的喜悅，語氣也不自覺放輕了。

三十五歲的年紀，正是當打之年，惟徐海山另有打算，暫時無意將全部精力投入工作。「有啲故事係咁嘅：主角忙完一大輪之後，去到最後，先發現其實佢要嘅嘢，本來就喺身邊！依家無論我點去搏，其實最終都係想家庭好，想小朋友可以健康成長，我依家已經擁有；如果我花時間喺其他方面，可能令已經有嘅嘢變成無！」

信自己40歲仍當打

現時一邊擔任區議員，一邊湊仔，他自覺處於「一個滿意嘅理想狀態」。「結咗婚十年，好好呀，依家有兩個小朋友，證明我當初嘅眼光無錯，無論係我揀人或者人揀我，哈哈哈哈……」

前途，對於慣作長遠打算的徐海山來說，自然有深思熟慮。「唔同嘅人生階段，應該做唔同嘅嘢，等兩個仔大啲，時間可能鬆動啲，到時我可能四十歲左右啦，仲係當打嘅黃金時間，再發揮囉！」

徐海山小檔案 Profile

年齡：35歲

學歷：香港中文大學工商管理學士

部分公職：

觀塘區議員

市區重建局觀塘分區諮詢委員會委員

國際戒毒基金會義務秘書

城市智庫副召集人

科薈研究中心理事